Ford ընկերությունը ԱՄՆ-ում ներկայացրել է Bronco ամենագնացի վեցերորդ սերունդը: Մոդելը վերակենդանացվել է ավելի քան քսան տարվա ընդմիջումից հետո: Նոր սերնդի Bronco-ն առանձանանում է աուտենտիկ դիզայնով, շրջանակային կառուցվածքով և շարժիչների ընտրությամբ: Տեղական շուկայում մոդելի գինը սկսվում է 28,5 հազար դոլարից:

Նոր Ford Bronco-ն կիսում է շրջանակային կառուցվածքը Ranger պիքապի հետ, որն առանձնանում է առջևի անկախ կախոցով: Մոդելը վերածնվել է երեք- և հինգդռնանի տարբերակներով, ընդ որում վերջինս ներկայացվում է առաջին անգամ: Ամերիկյան շուկայում մոդելը հասանելի կլինի յոթ տարբեր համալրումներով, ինչպես նաև կառաջարկվեն սահմանափակ սերիան և արտաճանապարհային Sasquatch փաթեթով սարքավորված տարբերակը: Վերջինս առանձնանում է 56 միլինետրով ավելի բարձր լուսածերպով, 35-դյույմանոց ցեխային անվադողերով և կախոցի հատուկ կարգավորումներով: Ակնկալվում է, որ Bronco ընտանիքը կհամալրվի նաև կրող թափքով Bronco Sport մոդելով, որը կառուցված կլինի ներկայիս Kuga-ի հենահարթակի հիման վրա:

Ավտոմեքենայի արտաքինը հիշեցնում է քսաներորդ դարի 60-ականների օրիգինալ Bronco-ն: Եզակի լուծումների թվում են մոդելի անվանման խոշոր գրվածքը ռադիատորի ճաղավանդակի վրա, առջևիի կլոր լուսարձակները, ինչպես նաև թափքի ընդահնուր համամասնությունները: Ընկերությունում համարում են, որ նորույթը միավորում է դասական ոճն ու նորագույն ինժեներական լուծումները: Բացի այդ շեշտվում է, որ Bronco-ն փոխառել է F-սերիայի պիքապների ամրությունն ու ունիվերսալությունը և Mustang-ի սպորտային ոգին:

Սրահում ուշադրություն է գրավում մուլտիմեդիա համակարգի 8- կամ 12-դյույմանոց սենսորային էկրանը, որի չափսը կախված է համալրումից: Կենտրոնական բարձակի վրա տեղակայված է փոխանցումատուփի տափօղակային փոխարկիչը, ինչպես նաև առկա են հանովի բռնակներ՝ նախատեսված վարորդի և առջևի ուղևորի համար:

Որպես հիմնական ընտրություն առաջարկվում է 2,3 լիտր ծավալով EcoBoost տուրբոշարժիչը, որը զարգացնում է 273 ձ.ուժ հզորություն և 420 Նմ ոլորող մոմենտ: Այն կարող է համակցվել կամ 7-աստիճան մեխանիկական, կամ 9-աստիճան ավտոմատ փոխանցումատուփերից որևէ մեկի հետ: Այլընտրանքային կարգով հասանելի է նաև 2,7 լիտր ծավալով V6 շարժիչը՝ 314 ձ.ուժ հզորությամբ և 542 Նմ ոլորող մոմենտով, որի համար նախատեսված է միայն ավտոմատ փոխանցումատուփը: Բոլոր մոդիֆիկացիաները լիաքարշ են, ունեն երեք ռեժիմներով աշխատող բաշխիչ տուփ, որի առանձնահատկությունը իջեցված փոխանցման 2,72 : 1 հարաբերակցությունն է:

Նոր Ford Bronco-ի հիմնական մրցակիցը Jeep Wrangler-ն է: Ինչպես և վերջինս, Bronco-ն առաջարկում է ձևափոխամն մի քանի տարբերակներ, օրինակ՝ հանվող դռներն ու տանիքի մի հատվածը, ընդ որում դռները կարելի է հանելուց հետո տեղավորել բեռնախցիկում: Ford Bronco պատվիրելու համար բավական է կատարել 100 դոլար կանխավճար, իսկ մեքենան գնորդներին կհասնի 2021 թվականի գարնանը: