Հանրահայտ ABT Sportsline աթելիեն հզորացրել է չորրորդ սերնդի Audi S8 սուպերսեդանը: Գերմանացի մասնագետների միջամտությունից հետո մեքենայի հզորությունը հասցվել է 700 ձիաուժի, իսկ 2,2 տոննա զանգվածով հինգմետրանոց հսկան իր արագացման ցուցանիշով գերազանցում է նույնիսկ նոր Porsche 911 Carrera 4S մոդելին:

Սերիական Audi S8 (D5 թափք) մոդելը սարքավորվում է չորսլիտրանոց բիտուրբոշարժիչով, որը զարգացնում է 571 ձ.ուժ հզորություն և 800 Նմ ոլորող մոմենտ: Շարժիչի կառավարման նոր էլեկտրոնային բլոկի շնորհիվ ABT Sportsline-ին հաջողվել է հասցնել այդ ցուցանիշը մինչև 700 ձ.ուժ և 880 Նմ: Այս չիփ-թյունինգից հետո տեղից մինչև 100 կմ/ժ արագացումը մոդելից պահանջում է 0,4 վայրկյան ավելի քիչ, քան նախկինում, և այժմ կազմում է 3,4 վայրկյան: Դա ավելի արագ է, քան BMW M760Li G12-ը և W222 թափքով նորացված Mercedes-AMG S 63-ը:

Բացի շարժիչի ուժեղացումից, ABT Sportsline-ը առաջարկում է փոխարինել սերիական անվասկավառակները հատուկ նախագծված 20- կամ 21-դյույմանոց ABT GR կամ ABT FR անվասկավառակներով: Ներկայացված լուսանկարներում Audi S8-ը պատկերված է 21-դյույմանոց 5-շյուղանի ալմաստե փոշեծածկույթով երկգույն ABT FR անիվներով: Առանձին առաջարկվում է նաև հետևի սփոյլերը: Թյունինգային աշխատանքների արժեքը 10990 եվրո է, իսկ առավելագույն արագության սահմանափակումը վերացնելու համար գնորդը ստիպված կլինի վճարել ևս 690 եվրո: