Seat Ateca քրոսովերից հետո թարմացվել է նաև դրա «լիցքավորված» տարբերակը, որը վաճառվում է Cupra ապրանքանշանի ներքո: Մոդելը ոչ միայն ստացել է նոր արտաքին տեսք, այլև դարձել է ավելի արագ: Նորացված Cupra Ateca-ն եվրոպական դիլերներին կհասնի մինչև ընթացիկ ամառվա վերջ:

Seat Ateca-ն ստացել է նոր թափարգելներ, ռադիատորի՝ նորովի ձևավորված ճաղավանդակ, արդեն իսկ բազային համալրմամբ առաջարակվող առջևի և հետևի լուսադիոդային լուսարձակներ: Սրահում ուշադրություն է գրավում 9,2-դույմանոց էկրանով նոր մուլտիմեդիա համակարգը, որն այժմ ունակ է աշխատել Apple CarPlay և Android Auto ծրագրերով:

Ղեկի ձախ կողմում տեղադրվել է կոճակ, որի օգնությամբ կարելի է ընտրել առաջարկվող ընթացային ռեժիմներից որևէ մեկը՝ Normal, Sport, Individual, Offroad, Snow և էքստրեմալ Cupra: Շարժիչի գործարկման կոճակը նույնպես տեղափոխվել է ղեկի վրա, իսկ դրա տեղը կենտրոնական բարձակի վրա զբաեցրել է կայունացման համակարգի անջատման կոճակը:

Ինչպես և նախկինում, «լիցքավորված» քրոսովերը սարքավորվում է երկլիտրանոց քառագլան տուրբոշարժիչով, որը զարգացնում է 300 ձ.ուժ և 400 Նմ ոլորող մոմենտ: Շարժիչը համակցվում է յոթաստիճան «ռոբոտացված» DSG փոխանցումատուփի և լիաքարշ 4Drive համակարգի հետ: Կարգավորումների օպտիմալացման շնորհիվ, մեքենան դարձել է ավելի դինամիկ: Տեղից մինչև 100 կմ/ժ արագությունը այն զարգացնում է 4,9 վայրկյանում, նախկին 5,3 վայրկյանի փոխարեն: Առավելագույն արագությունը սահմանափակված է 247 կմ/ժ ցուցանիշով: