Բրիտանական Rolls-Royce ընկերությունը գաղտնազերծել է 1:8 մասշտաբով պատրաստված խաղալիք Cullinan ամենագնացի արժեքը: Այդպիսի մեկ ավտոմեքենայի ստեղծման համար ընկերության մասնագետները ծախսում են շուրջ 450 ժամ, ինչը լիաչափ մոդելի հավաքման համար անհրաժեշտ ժամանակի գրեթե կեսն է:

Rolls-Royce-ը համեմատում է Cullinan-ի մասշտաբային մոդելը արվեստի գործի հետ և հայտարարում, որ խաղալիք պատճենը հավաքում են ձեռքով, ներկում և հղկում ճիշտ այնպես, ինչպես սերիական ամենագնացը: Բացի այդ, պատվիրատուն կարող է ինքնուրույն որոշել խաղալիքի արտաքինը՝ հասանելի 40 հազար երանգներից ընտրելով թափքի և ինտերիերի գույները, ինչպես նաև անհատականցնելով սրահի լրամշակման նյութերը, ներառյալ կաշեպատ նստատեղերի դարձակարերը:

Առավելագույն մանրամասնությամբ իրականացված են ոչ միայն թափքն ու սրահը: Այսպես, խաղալիք կապոտի տակ տեղադրված է 6,75-լիտրանոց V12 շարժիչի ճշգրտորեն փոքրացրած կրկնօրինակը, դռների խորշերից կարելի է հանել մանրակերտ անձրևանոցներ, իսկ դիոդային լուսարձակների պատկերը կրկնում է իսկական Cullinan-ի լուծումները: Խաղալիք Rolls-Royce-ի երկարությունը մոտ 70 սանտիմետր է, և դրա համար նախատեսված է մոտ մեկ մետր չափսի դեկորատիվ տուփ:

Էլ ավելի տպավորիչ է մասշտաբային Rolls-Royce-ի արժեքը: Բազային համալրմամբ խաղալիք Cullinan-ը առաջարկվում է 17100 ԱՄՆ դոլարով, իսկ առավել անհատականացված տարբերակի համար գնորդը ստիպված կլինի վճարել 32765 ԱՄՆ դոլար: Բավական է ասել, որ նշված գնային տիրույթում Հյուսիսային Ամերիկայում կարելի է ձեռք բերել Toyota Corolla-ի գրեթե բոլոր մոդիֆիկացիաները: