Arcfox ապրանքանշանը, որը պատկանում է չինական BAIC կոնցերնին, ներկայացրել է α-T անվանումը ստացած միջին չափսի էլեկտրական քրոսովերը՝ հիմնված անցյալ տարի ցուցադրված Arcfox ECF կոնցեպտի վրա: Մեքենայի նախագծման աշխատանքներին մասնակցել է հայտնի Magna International ընկերությունը, իսկ դրա դիզայնի հեղինակը Alfa Romeo-ի, Audi-ի և Volkswagen-ի նախկին աշխատակից Վալտեր դը Սիլվան է:

Arcfox α-T ամենագնացը առաջինն է, որ կառուցվել է IMC (Intelligent Module Criterion) մոդուլային հենահարթակի վրա,որի մեջ ինտեգրված է 5G և C-V2X ստանդարտներով աշխատող Huawei MH5000 կապի մոդուլը: Չիպը ապահովում է տվյալների փոխանցում բազային կայանից դեպի ընդունիչ սարքը վայրկյանում մինչև երկու գիգաբիտ, իսկ հակառակ ուղղությամբ՝ վայրկյանում 230 մեգաբիտ արագությամբ: Այն նաև անմիջապես ներգրավված է ավտոմեքենայի մի քանի ինտելեկտուալ համակարգերի աշխատանքում:

Ամենագնացը ճանաչում է մարդկանց ժեստերը, ձայները, դեմքերը և սարքավորված է մատնահետքի սքաներով: Ինքնավար համակարգը (ըստ երևույթին՝ երրորդ մակարդակի) բաղկացած է 23 գերճշգրիտ ցուցիչներից և տեսախցիկներից, որոնք օգնում են կողմնորոշվել տարածության մեջ, ինքնուրույն կայանել և ճանաչել ճանապարհային նշանները: Կենտրոնական 4K-դիսփլեյի անկյունագիծը 20,3 դյույմ է: Պրեմիում կարգի աուդիոհամակարգը աշխատում է QuantumLogic տարածական հնչողության ալգորիթմերով, իսկ համայնապատկերային տանիքի մակերեսը 2,6 քառակուսի մետր է:

Լիաքարշ α-T-ն սարքավորվում է երկու էլեկտրական շարժիչներով, որոնք միասին զարգացնում են 218 ձ.ուժ հզորություն և 360 Նմ ոլորող մոմենտ: Ըստ արտադրողի՝ ուժային ագրեգատը նախագծվել է Siemens, Valeo և BorgWarner ընկերությունների հետ համատեղ: 93,6 կՎտժ տարողությամբ մարտկոցը արտադրել է կորեական SK Innovation ընկերությունը: Այն թույլ է տալիս քրոսովերին մեկ ամբողջական լիցքավորումով հաղթահարել 653 կմ NEDC ցիկլում: