Ամեն տարի ավտոմոբիլային ոլորտի առաջատար կազմակերպությունների մի քանի տասնյակ (այս տարի դրանք 86 էին) հեղինակավոր մասնագետներ ընտրում են տարվա լավագույն ավտոմեքենաները մի քանի անվանակարգերում: Հաղթողների անունները հայտարարվում են շքեղ արարողության ընթացքում, որին սովորաբար մասնակցում են հազարավոր հյուրեր: Այս տարի առաջին անգամ հաղթողների անունները հայտարարվեցին համացանցում:

2020 թվականին ժյուրին ավտոմեքենաներ էր ընտրում հինգ տարբեր անվանակարգերում, որոնցից ավանդաբար առավել կարևոր է համարվում «Տարվա լավագույն ավտոմեքենա» (World Car of the Year) անվանակարգը: Այս տարի այդ պատվավոր մրցանակը բաժին հասավ Kia Telluride ամենագնացին, որը տպավորել էր քվեարկողներին իր դիզայնի և նորագույն տեխնոլոգիաների մտածված համադրությամբ: Ժյուրիի կարծիքով այն ավելի արժանի էր այդ մրցանակին, քան համապատասխանաբար երկրորդ և երրորդ տեղերը զբաղեցրած Mazda CX-30-ը և Mazda3-ը:

Անցած տարի ներկայցված ամբողջովին էլեկտրական Porsche Taycan մոդելը լավագույնը ճանաչվեց միանգամից երկու անվանակարգում: Գերմանական ավտոմոբիլաշինության նորագույն նվաճումը ստացավ «Լավագույն սպորտային ավտոմեքենա» (World Performance Car) և «Լավագույն շքեղ ավտոմեքենա» (World Luxury Car) մրցանակները՝ առաջ անցնելով այնպիսի մրցակիցներից, ինչպիսին են Mercedes-Benz EQC-ն և իր «արյունակից» Porsche 911 և Porsche 718 մոդելները:

«Լավագույն քաղաքային ավտոմեքենա» (World Urban Car) անվանակարգում իրեն հավասարը չուներ հարավկորեական մեկ այլ մոդել՝ էլեկտրական Kia Soul EV-ն: Բավական սուր պայքարում այն իրենից հետ թողեց Mini Cooper SE Electric և Volkswagen T-Cross մոդելներին: Ինչպես և ակնակլվում էր քաղաքային պայմաններում շահագործման տեսանկյունից առավելությունը տրվեց հենց էլեկտրական ավտոմեքենաներին:

Եվ վերջապես հինգերորդ անվանակարգում, այն է՝ «Տարվա լավագույն դիզայն» (World Car Design of the Year), հաղթանակը շնորհվեց նոր սերնդի Mazda3 հեչբեքին: Երկրորդ և երրորդ տեղերը զբաղեցրել են Peugeot 208-ը և արդեն իսկ հիշատակված Porsche Taycan-ը: