Հարավկորեական Hyundai ընկերությունը ներկայացրել է Prophecy («Մարգարեություն») անվանումը ստացած էլեկտրական կոնցեպտը, որը մարմնավորում է մակնիշի ապագա փիլիսոփայությունը: Նոր նախատիպը անցած տարի ցուցադրված 45 EV կոնցեպտուալ մոդելի տրամաբանական զարգացումն է: Այն հրաժարվել է բարդ գծերից և աչքի է ընկնում մինիմալիստական դիզայնով, որը հետագայում կարտացոլվի սերիական մոդելներում:

Միևնույն ժամանակ նորույթը որոշ տարրեր ժառանգել է իր նախորդից, օրինակ պիքսելային լուսարձակները: Prophecy-ում դրանք առկա են թե առջևի, թե հետևի օպտիկական բլոկերում, ինչպես նաև ներկառուցված են սփոյլերի մեջ: Ընկերությունում վտսահեցնում են, որ այս լուծումը շատ շուտով կհայտնվի արդեն իսկ վաճառվող ավտոմեքենաների վրա:

Կոնցեպտը ստացել է շրջահոսելի կաթիլաձև թափք, թափանցիկ սփոյլեր և ռադիատորի կեղծ ճաղավանդակ, որը ներկառուցված է հետևի թափարգելի մեջ: Սրահում առաջարկվում են չորս առանձին նստատեղեր: Սրահի մուտքը հեշտացնելու համար դիզայներները հրաժարվել են նույնիսկ կենտրոնական կանգնակից:

Քանի որ ավտոմեքենան նախագծվել է որպես իքնավար մոդել, կենտրոնական բարձակին չեք տեսնի կառավարման ավանդական օրգանները: Ղեկի փոխարեն վարորդի նստատեղի երկու կողմերից տեղադրված են ջոյսթիքներ, իսկ սարքավորումների վահանակը արտացոլվում է ամբողջ առջևի վահանակը զբաղեցնող թվային դիսփլեյի վրա: