Ճապոնական Toyota ընկերությունը Չիկագոյի ավտոցուցահանդեսի շրջանակներում ներկայացրել է հյուսիսամերիկյան շուկայի համար նախատեսված երեք նորույթ՝ Tacoma, Tundra և Sequoia ամենագնացների Nightshade Edition (բառացի՝ «գիշերային ստվեր») մոդիֆիկացիաները: Այս լուծումը տարբերվում է թափքի սև կամ գորշ ներկվածքով և մգեցված քրոմի առատ կիրառմամբ:

Նշված ոճային փաթեթը մինչ այս պահը հասանելի էր միայն Corolla, Camry, 4Runner և Sienna մոդելների համար: Ի տարբերություն նշվածների, որոնց համար Nightshade Edition ոճավորումը հասանելի է SE համալրման մեքենաների հետ, Tacoma-ն, Tundra-ն և Sequoia-ն «գիշերային տեսքով» հասանելի կլինեն միայն ամենաբարձր համալրմամբ:

Փաթեթը ներառում է սև կաշեպատ նստատեղեր, ռադիատորի մգեցված ճաղավանդակ, դռների սև բռնակներ և արտաքին հայելիների մգեցված վերդիրներ: Tacoma Nightshade Edition-ը առաջարկվում է 18-դյույմանոց Dark Smoke անվասկավառակներով, Tundra-ն արտաքինից կտարբերվի սև անվահեծերով և արտանետման խողովակի սև վերդիրով, իսկ Sequoia-ն՝ սև տարբերանշաններ և մուգ քրոմով լրամշակված մոլդինգներ: Բոլոր երեք մոդելները հասանելի կլինեն նշված գույներից որևէ մեկով՝ Midnight Black Metallic կամ Magnetic Grey Metallic: